बागलुङमा भेटिए प्राणघातक सङ्क्रामक स्क्रब टाइफसका बिरामी

बागलुङमा स्क्रब टाइफसका बिरामी फेला परेका छन्। बागलुङको धौलागिरी अस्पतालमा उच्च ज्वरो आएर उपचारका लागि आएका तीन जनामा स्क्रब टाइफस देखापरेको अस्पतालले जनाएको छ।

प्राणघातक सङ्क्रमणका रुपमा लिइँदै आएको स्क्रब टाइफस यही साउन महीनामा मात्रै तीन जनालाई फेला परेको धौलागिरी अस्पतालका सूचना अधिकारी तीर्थ गौतमले जानकारी दिए।

बुधबार मात्रै उच्च ज्वरो आएपछि अस्पताल भर्ना गरिएको जैमिनी नगरपालिका–२ का ४२ वर्षीय पुरुषमा स्क्रब टाइफस देखिएको छ। उनको धौलागिरी अस्पतालमा भर्ना गरी उपचार भइरहेको छ।

यस्तै १० साउनमा बागलुङ नगरपालिका–२ का एक र १२ साउनमा पर्वत जिल्लाको फलेवास नगरपालिका–३ का एक जनालाई स्क्रब टाइफस देखिएको थियो। दुवै जना अस्पतालबाट स्वास्थ्य लाभ गरी घर फर्किएको अस्पतालले जनाएको छ। बागलुङमा गत वर्ष सात जनामा स्क्रब टाइफसका बिरामी फेला परेका थिए।

स्क्रब टाइफस रोग ‘ओरेन्सिया सुसुगमुसी’ नामक परजीवीको सङ्क्रमणले लाग्ने गर्दछ। यो परजीवीलाई एक प्रकारको ‘माइट’ जातिको सूक्ष्म कीराले सार्ने गर्दछ। रोगको कीटाणु बोक्ने ‘माइट’ स–साना बोटबिरुवाको झाडीमा बस्छ। केही वर्षअगाडि सम्म स्क्रब टाइफस धेरैजसो पहाडी र दुर्गम स्थानमा मात्रै देखिँदै आएकामा पछिल्लो समय शहरी इलाकामा पनि देखिँदै आएको छ।

नेपालमा भने मुसाले यो रोग सारेको पाइएको छ। झाडीमा बस्ने मुसाको कानमा पाइने उक्त ‘माइट’ झाडीमा सर्ने र सो झाडीमा मानिस जाँदा ‘माइट’ ले मानिसलाई टोकेको कारणले गर्दा यो रोग भएको पाइएको छ। स्क्रब टाइफस भएका मानिसमा उच्च ज्वरो आउने र कामज्वरोसमेत आउन सक्दछ।

टाउको दुख्नु, खोकी लाग्नु, मांसपेशी दुख्नु, पाचन अङ्गमा गड्बडी आउनु, शरीरमा रातो बिमिरा देखिनु आदि यसका प्रमुख लक्षण हुन्। रोग समयमै उपचार नगरेमा वा जीर्ण बन्दै गएको खण्डमा कलेजो, मिर्गौला, फोक्सो, मुटुलगायत अङ्गमा सङ्क्रमण फैलिई बिरामीको मृत्युसमेत हुन सक्छ। यो रोग पहिचान गरी उपचार गर्न सकिन्छ।

समाचार

बागलुङमा भेटिए प्राणघातक सङ्क्रामक स्क्रब टाइफसका बिरामी

हिमालखबर शनिबार, साउन २४, २०७७

तस्वीर: हेल्थ डाजेस्ट