उपत्यकामा कोरोना संक्रमण बढ्न थालेपछि सिंहदरबारका कर्मचारीको पीसीआर परीक्षण {तस्वीरहरू}

काठमाडौं उपत्यकामा कोरोना संक्रमितको संख्या बढ्न थालेपछि सरकारले देशकै मुख्य प्रशासकिय केन्द्र सिंहदरबारभित्रका कर्मचारीको पीसीआर परीक्षण थालेको छ।

सिंहदरबारभित्रका कार्यालयमा कार्यरत कार्यालय सहयोगी, सवारी चालक र प्रत्यक्ष बाहिरी मान्छेको सम्पर्कमा रहने ७ सय कर्मचारीहरूको पीसीआर परीक्षणका लागि बुधबार नमुना संकलन गरीएको छ।

प्रधानमन्त्री तथा मन्त्रिपरिषद् कार्यालयका सचिव महेन्द्र प्रसाद गुरागाईंका अनुसार सिंहदरबारभित्रका सबै कार्यालयका करिब ७ सयजना कर्मचारीको नमुना संकलनको तयारी भएको छ। परीक्षणपछि उपत्यका भित्रको अवस्था के छ भनेर आंकलन गर्न सकिने उनको तर्क छ।

काठमाडौं उपत्यकामा मंगलबार मात्रै ६१ जनामा कोरोना संक्रमण देखिएको थियो। जसमा ३२ जना प्रहरी प्रधानकार्यालयमा कार्यरत रहेका छन्।

उपत्यकामा कुल संक्रमितको संख्या ४ सय ७७ पुगेको छ। काठमाडौँंमा ३३६, ललितपुरमा ९० र भक्तपुरमा ५० जना संक्रमित रहेको स्वास्थ्य तथा जनसंख्या मन्त्रालयको तथ्याङ्कमा राखिएको छ।