संखुवासभाको तुम्लिङटार बजार डुबानमा, तीन घर भत्किए
अविरल वर्षाले खाँदबारी–९ मा पर्ने तुम्लिङटार बजार डुबानमा परेको छ। तुम्लिङटार बजार क्षेत्रका माटो र ढुङ्गाले बनेका तीन कच्ची घर भत्किएका छन्।
तुम्लिङटारका विनोद बाह्रकोटी, कृष्ण श्रेष्ठ र सम्सेर मगरको घर भत्किएको जिल्ला प्रहरी कार्यालय संखुवासभाका प्रहरी नायब उपरीक्षक नवराज मल्लले जानकारी दिए। पहिरोले ढुंगेबिसौनीका वीरसुन्दर श्रेष्ठको घर, खाँदबारी–३ का गीता दर्जी र नारायण बुढाथोकीको घरमा पनि क्षति पुगेको छ।
तुम्लिङटार बजार अरुण नदीको तटीय क्षेत्र हाे। लगातारको वर्षाले अरुण नदीमा पनि पानीको बहाब बढेको छ। नदीको सतह सतर्कता विन्दु पार भएको भन्दै बुधबार उक्त नदी तटीय क्षेत्रका बासिन्दालाई सजग रहन बाढी पूर्वानुमान महाशाखाले अनुरोध गरेको थियो।
संखुवासभामा पहिरोले विभिन्न स्थानमा क्षति पुर्याएको छ। लगातार परेको वर्षासँगै आएको पहिरोले खाँदबारी नगरपालिका–६ तल्लो पाङ्ठामा एउटा घर पुरिँदा एक जना गम्भीर घाइते भएका छन्। सोमबार राति ३ बजे माथिबाट खसेको पहिरोले घर पुरिँदा खाँदबारी–६ का शान्तिबहादुर खत्री घाइते भएका हुन्। उनलाई स्थानीयवासीले उद्धार गरेर जिल्ला अस्पताल खाँदबारी ल्याएको खाँदबारी–६ का वडाध्यक्ष दयानिधि बरालले जानकारी दिए।
जिल्ला कारागारसमेत जोखिम परेको छ। पहिरोले चारैतिर तान्न थालेपछि पहिरोको उच्च जोखिममा परेको खाँदबारी कारागारका प्रमुख विनोद अधिकारीले बताए।
उनका अनुसार कारागारको माथिल्लो भाग र तल्लो भाग दुवैतिर पहिरोले तान्न थालेको छ। जिल्ला कारागारमा अहिले १२४ कैदीबन्दी छन्।
त्यस्तै पहिरोका कारण संखुवासभाको भोटखोला जाने सडक अवरुद्ध भएको छ। उत्तर-दक्षिण सडकखण्डको मकालु गाउँपालिका–३ को सम्माटारमा पहिरो खसेपछि सदरमुकाम खाँदबारीबाट भोटखोला गाउँपालिका जाने सडकखण्ड १५ दिनदेखि अवरुद्ध भएको उत्तर-दक्षिण सडक कार्यालयका प्रमुख इन्जिनीयर गौतमकुमार श्रेष्ठले जानकारी दिए।
उत्तर-दक्षिण सडकखण्डको मकालु–३ को सम्माटार र उवाँमा पहिरो झरेपछि सडक अवरुद्ध भएको इन्जिनीयर श्रेष्ठले बताए। सडक अवरुद्ध भएपछि भोटखोला गाउँपालिकासँग सम्बन्ध टुटेको छ।
अहिले सदरमुकाम खाँदबारीबाट भोटखोला जाने यातायात मकालु गाउँपालिकाको हेदाङनागढीसम्म चलिरहेको छ। लगातार वर्षा भइरहेका कारण अवरुद्ध भएको सडक कहिले खुल्छ भन्ने यकिन हुन नसकेको उनले बताए।
-1732261651.jpg)
-1732259528.jpg)
-1732180391.jpg)