भएको एउटै ब्रेथलाइजर बिग्रिएपछि मुख सुँघेरै मापसे जाँच
प्रदेश–७ का पहाडी जिल्लामा ‘ब्रेथलाइजर’को अभावमा ट्राफिक प्रहरी सवारी चालकको मुख सुघेर मादकपदार्थ सेवन गरे नगरेको पत्ता लगाउन बाध्य छन् ।
तस्वीर : गुगल डटकम
डोटीलगायत अन्य पहाडी जिल्लामा सवारी साधन चलाउँदा मादक पदार्थ सेवन गरेनगरेको जाँच गर्ने उपकरण ‘ब्रेथलाइजर’ नहँुदा ट्राफिक प्रहरीलाई मापसे जाँच गर्न मुख सुँघेर चालकको हाउभाउ हेरर मापसे जाँच गर्दै आएका छन् ।
बिग्रेका उपकरण मर्मतका लागि अत्तरियास्थित क्षेत्रीय ट्राफिक प्रहरी कार्यालय पठाएको पनि लामो समय भइसक्दासमेत मर्मत गरेर नपठाइदिँदा डोटीलगायत डडेल्धुरा, बैतडी, बझाङ, अछाम, बाजुरा तथा दार्चुला जिल्लाका ट्राफिक प्रहरीलाई जाँच गर्न समस्या भएको हो ।
दिपायल जिल्ला ट्राफिक प्रहरी कार्यालयका अनुसार चालकको मुख सुँघ्ने विषयमा कहिलेकाहीँ त ठूलै विवाद हुने गर्दछ ।
उक्त कार्यालयका प्रमुख प्रहरी नायब निरीक्षक मोहनसिंह धामीले जिल्लाभर एकमात्र ‘ब्रेथलाइजर’ भएको र त्यो पनि बिग्रेर मर्मतका लागि कैलाली पठाएको बताए ।
उनले भने, ‘एउटा मात्रै मेशिन थियो, त्यो पनि वर्षौं पहिले बिग्रेकाले मर्मतका लागि पठाएका छौँ, बनेर फिर्ता नआएकाले चालकले मादक पदार्थ सेवन गरेको छ छैन भन्नका लागि मदिराको गन्धले, आँखामा हेरेर र शारीरिक अवस्थाबाट पत्ता लगाउनुपर्ने अवस्था रहेको बताए ।
क्षेत्रीय ट्राफिक प्रहरी कार्यालयका प्रमुख एसपी केदार रजौरेले बिग्रेका ब्रेथलाइजर उपकरण मर्मतका लागि केन्द्रीय कार्यालय पठाएकामा हालसम्म फिर्ता नआएको बताए ।
उक्त कार्यालयको जिन्सी शाखाका अनुसार सुदूरपश्चिम प्रदेशका कैलालीमा एक, कञ्चनपुरमा एक र अत्तरिया दुईबाहेक अन्य सात जिल्लाका कुनै पनि ट्राफिक प्रहरीसँग ब्रेथलाइजर छैन ।
ब्रेथलाइजरको अभाव भएपछि यहाँका ट्राफिक प्रहरीले ब्रेथलाइजर किनिदिन स्थानीय तहसँग माग गरेका छन् । सो उपकरण २८ हजारसम्म रकम पर्ने र ट्राफिक प्रहरीसँग बजेट नभएकाले किन्न नसकेको बताइएको छ ।
कञ्चनपुरमा सबैभन्दा बढी मादक पदार्थ सेवन गरेर गाडी चलाउने बढ्न थालेपछि त्यहाँ रहेको जिल्ला ट्राफिक प्रहरीको आग्रहका स्थानीय भिमदत्त नगरपालिकाले हालै एउटै ब्रेथलाइजर किनिदिएको क्षेत्रीय ट्राफिक प्रहरी कार्यालय जनाएको छ ।
प्रायः खैनी गुट्खा खाएका चालकलाई जाँच गर्दा उनीहरूले खाएको खैनी, गुट्खा ब्रेथलाइजरभित्र पर्ने भएका कारण बढी छिटो बिग्रिने गरेको ट्राफिक प्रहरीको गुनासो छ ।
कैलालीको अत्तरियादेखि डोटीको सिलगढीसम्म ट्राफिक प्रहरीका सातवटा जाँचपोष्ट भए पनि कुनै पनि पोष्टमा ब्रेथलाइजर नभएकाले ट्राफिक प्रहरीलाई चालकले कति प्रतिशत मादक पदार्थ सेवन गरेको छ छुट्ट्याउनै मुस्किल पर्ने गरेको बताइएको छ ।
स्थानीय निकायलाई ‘ब्रेथलाइजर’ किनिदिन आग्रह गरे पनि हालसम्म कसैले पनि नकिनेको जिल्ला ट्राफिक प्रहरी कार्यालय ट्राफिक प्रहरी बताउँछन् ।
-1732353496.jpg)
