देशैभर रोपाइँ, धन्य मनसुन ! (तस्वीरहरु)
नेपाली समाजमा असार महीनालाई ‘मानो रोपेर मुरी उब्जाउने समय’को रुपमा लिइन्छ । तर, यसका लागि किसान सधैं मनसुनमा भर पर्नुपर्छ।
यो वर्ष मनसुनले साथ दिएपछि किसानले जेठ अन्तिम सातादेखि धामधम रोपाइँ थालेका छन्। सातै प्रदेशका किसानलाई यतिबेला रोपाइँको चटारो छ।
कृषि तथा पशुपक्षी विकास मन्त्रालयको १० असारसम्मको तथ्यांक अनुसार देशैभर २० प्रतिशत रोपाइँ सकिएको छ। हालसम्म २ लाख ७५ हजार २९ हेक्टरमा रोपाइँ भएको छ।
गतवर्ष देशभर १४ लाख ५८ हजार ९१५ हेक्टरमा रोपाइँ भएको थियो। तर, मौसमको अनुकूलताले यो वर्ष अझै बढी क्षेत्रफलमा रोपाइँ हुने अनुमान मन्त्रालयको छ।
यो वर्ष समयमै वर्षा भएकाले बन्दाबन्दीबीच पनि जसोतसो बीउको जोहो गरेर किसानले रोपाइँ थालेका हुन्।
सरकारले आवश्यक रासायनिक मल अभाव हुन नदिने हो भने गतवर्षको तुलनामा यो वर्ष धान उत्पादन पनि बढ्ने सम्भावना छ।
यसले बन्दाबन्दीमा शिथिल अर्थतन्त्रलाई थोरै भए पनि भरथेग गर्ने विश्वास गरिएको छ।
यो पनि पढ्नुहोस्—देशैभर धमाधम धान रोपिंदै, युवाशक्ति गाउँगाउँ पुगेकाले उत्पादन बढ्ने
