नेपालको संविधान संशोधन विधेयक राष्ट्रियसभाबाट सर्वसम्मत स्वीकृत
'नेपालको संविधान (दोस्रो) संशोधन विधेयक, २०७७' माथि विचार गरियोस् भन्ने प्रस्ताव राष्ट्रियसभाको बैठकले सर्वसम्मत स्वीकृत गरेको छ ।
आज बसेका राष्ट्रियसभाका दुई वटा बैठकमध्ये पहिलो बैठकमा राष्ट्रियसभाका सचिव राजेन्द्र फुयाँलले प्रतिनिधिसभाबाट सन्देशसहित प्राप्त ‘नेपालको संविधान (दोस्रो) संशोधन विधेयक, २०७७’ टेबुल गरेका थिए ।
१५ मिनेट स्थगित गरेर फेरि बसेको दोस्रो बैठकमा कानून, न्याय तथा संसदीय मामिला मन्त्री डा. शिवमाया तुम्बाहाङ्फेले प्रतिनिधिसभाबाट सन्देशसहित प्राप्त संविधान संशोधन विधेयक प्रस्तुत गरेकी थिइन् । त्यसपछि शुरु भएको सैद्धान्तिक छलफलमा सांसदहरूले नयाँ नक्शा जारी गर्नु ऐतिहासिक निर्णय भन्दै अब भूमि फिर्ता ल्याउने पहल गर्नुपर्ने बताएका थिए ।
छलफलमा भाग लिँदै सांसदहरू सुमनराज प्याकुरेल, मायाप्रसाद शर्मा, गोपीबहादुर सार्की अछामी, डा.विमला राई पौड्याललगायतले नयाँ नक्सा जारी गरेकोप्रति सरकारको कामको प्रशंसा गर्दै अब भूमि फिर्ता ल्याउन सबै एकजुट हुनुपर्ने बताए । त्यस्तै सांसद तारादेवी भट्ट, रमेशजंग रायमाझीलगायतले पूर्वदेखि पश्चिमसम्मकै गुमेका भूमि फर्काउन अब एकैपटक पहल गर्नुपर्ने बताए ।
सांसदहरूले बलियो प्रमाणका साथ अघि बढ्नुपर्ने भन्दै सकेसम्म चाँडो वार्ताको पहल गर्न सरकारलाई सुझाव दिए ।
विधेयकमाथि सैद्धान्तिक छलफलमा उठेका जिज्ञासाको जवाफ दिँदै कानुन मन्त्री डा. तुम्बाहाङफेले प्रतिनिधिसभामा जस्तै सबैको एकमतले राष्ट्रियसभाबाट विधेयक पारित गरेर राष्ट्रिय एकता प्रदर्शन गर्नुपर्ने बताइन् । उनले प्रतिनिधिसभाबाट विधेयक पारित भएसँगै ‘नेपालका सबै राजनीतिक दल राष्ट्रियताको सवालमा एक हुन्छन् भन्ने पुष्टि भएको पनि बताइन् ।
सरकारले सार्वजनिक गरेको नेपालको अद्यावधिक नक्शा अनुसार संविधानको अनुसूची ३ सच्याउन संविधान संशोधन विधेयक ल्याइएको हो ।
-1732261651.jpg)
-1732259528.jpg)
