तीन दिनमै बढे ७२८ कोरोनाभाइरस संक्रमित
पछिल्लो तीन दिनमा नेपालमा ७२८ जना कोरोनाभाइरस संक्रमितका नयाँ बिरामी फेला परेका छन् । सोमबार, मंगलबार र बुधबार नयाँ संक्रमित ह्वात्तै थपिएका हुन् ।
गत सोमबार पहिलोपटक एकै दिन २०० भन्दा बढीको संख्यामा नयाँ संक्रमित भेटिएका थिए । त्यस यता हरेक दिन २०० भन्दा बढी संक्रमित भेटिएका छन् । मंगलबार अहिलेसम्मकै बढी २८८ संक्रमित भेटिएका छन् ।
नेपालमा कूल संक्रमितको संख्या दुई हजार ३०० पुगेको छ । तीमध्ये २७८ जना निको भएका छन् भने नौ जनाको मृत्यु भएको छ । अहिले उपचाररत संक्रमितको संख्या दुई हजार १३ छ ।
संक्रमितको संख्या बढ्न थालेपछि अस्पतालहरुमा बेड अभाव हुन थालेको छ । सरकारले अब गम्भीर बिरामी परेका बाहेक अन्य संक्रमितलाई घरैमा राखेर उपचार गर्ने गरी निर्देशिका जारी गरीसकेको छ ।
कोरोना संक्रमित भएर लक्षण नदेखिएमा अबदेखि घरमै बस्नुपर्ने गरी निर्देशिका जारी भएको हो । लक्षण नदेखिएका र सामान्य लक्षण देखिएकालाई अस्पतालमा राख्दा गम्भीर बिरामीहरूलाई उपचार गर्न अप्ठेरो हुनसक्ने भन्दै सरकारले निर्देशिका जारी गरेको हो ।
स्वास्थ्य तथा जनसंख्या मन्त्रालयले जारी गरेको ‘कोभिड १९ आइसोलेसन व्यवस्थापन सम्बन्धी निर्देशिका २०७७’ अस्पतालमा आइसोलेसन र घरमा आइसोलेसनमा बस्दा ध्यान दिनुपर्ने कुरालाई उल्लेख गरिएको छ ।
नेपालमा ३ फागुनमा कोरोना संक्रमित पहिलो व्यक्ति फेला परेका थिए । त्यस यता ८३ दिनमा मात्र संक्रमितको संख्या १०० पुगेको थियो भने ९८ दिनमा ५०० पुगेको थियो । तर, ५०० पुगेको ६ दिनमा नै संक्रमित संख्या एक हजार नाघेको थियो । त्यसपछि तीव्र गतिमा संक्रमितहरु बढिरहेका छन् ।
-1732353496.jpg)
