बन्दाबन्दी नगरी जापान कोरोनाभाइरस नियन्त्रण गर्न सफल
विश्व स्वास्थ्य संगठन (डब्लुएचओ) ले कोरोनाभाइरस नियन्त्रणको एक मात्र उपाय बन्दाबन्दी र धेरैभन्दा धेरै स्वाब परीक्षण नै भएको जनाएको छ । बन्दाबन्दी गरे पनि विश्वका धेरै देशमा जोखिम घटेको छैन । तर, जापानले बन्दाबन्दी लागू नगरी कोरोनाभाइरस नियन्त्रण गरेको छ ।
आलोचनाबीच जापान सरकारले देशव्यापी बन्दाबन्दी घोषणा गरेन । संकटकाल भने लागू थियो । तर, जनतालाई घरबाहिर निस्कन र काम गर्न छुट थियो ।
अन्य देशमा जस्तो त्यहाँको सरकारलाई देशव्यापी बन्दाबन्दी घोषणाको अधिकार समेत छैन । स्थानीय गभर्नरहरुले कारोबार बन्द गर्ने र मानिसहरुलाई घरैमा बस्ने आह्वान गर्न सक्छन् । तर यस्तो आग्रह नमान्नेलाई कानूनी कारबाही गर्न सकिँदैन ।
संक्रमण फैलन थालेपछि मानिसहरुको आवातजावतमा भने केही कमी आएको थियो । तर, काममा जान भने रोकिएन । मानिसहरुको दैनिक स्वभाविक ढंगमा चलेको थियो ।
डब्लुएचओले स्वाब परीक्षण धेरैभन्दा धेरै गर्न आग्रह गरिरहँदा जापानले गम्भीर बिरामी परेकाको मात्र जाँच गरेको थियो । त्यहाँ जम्मा जनसंख्याको ०.२ प्रतिशतको मात्र स्वाब जाँच गरिएको थियो ।
अत्यधिक कम परीक्षण भएको भन्दै प्रधानमन्त्र शिन्जो आबेको आलोचना पनि भएको थियो । तर, ‘कन्ट्याक्ट ट्रेसिङ’ सम्बन्धि रणनीति सफल भएपछि संक्रमण फैलनबाट रोक्न जापान सफल भएको हो ।
जापानमा कूल संक्रमित १६ हजार ८५१ मध्ये १४ हजार ४५९ जना निको भएका छन् । ८९१ जनाको मृत्यु भएको छ ।
अहिले त्यहाँ उपचाररत संक्रमित एक हजार ५०१ जना छन् । यो संख्या प्रत्येक दिन घटिरहेको छ । दैनिक ५० भन्दा कम नयाँ संक्रमित भेटिन्छन् ।
-1732353496.jpg)
