छविलाल विश्वकर्माः सत्ता सुविधामा नरहेका अध्यक्ष ओली खेमाका एक्ला स्थायी कमिटी सदस्य

पार्टी अध्यक्ष एवं प्रधानमन्त्री केपी शर्मा ओलीलाई साथ दिनेमध्ये सत्तामा भूमिका नपाउने छविलाल विश्वकर्मा एक मात्र स्थायी कमिटी सदस्य हुन् अनि दलित समुदायका पार्टीकै वरिष्ठ नेता ।

कुनै समय भलिबल राष्ट्रिय टीमका महत्वपूर्ण सदस्य थिए, छविलाल विश्वकर्मा । देशका लागि भलिबल खेलाडीका रुपमा लगाएको जर्सी छाडेपछि भने उनी राजनीतिमा लागे ।

तत्कालीन नेपाल कम्युनिष्ट पार्टी (एमाले)को भारत प्रवास संगठन हुँदै विश्वकर्मा राष्ट्रिय राजनीतिमा अघि बढे । अहिले, विश्वकर्मा सत्तारुढ नेकपाको स्थायी कमिटी सदस्य जस्तो उच्च पदमा पुगेका छन् ।

संयोग, पार्टीमा उनले पटकपटक साथ दिएका नेता केपी शर्मा ओली नै अहिले पार्टी अध्यक्ष र प्रधानमन्त्री दुवै छन् ।

यति बेला नेकपाको स्थायी कमिटी राष्ट्रिय राजनीतिको केन्द्रमा छ । अध्यादेश पछाडि स्थायी कमिटी बोलाउनुपर्ने माग चर्को गरी उठेकाले राष्ट्रिय राजनीतिको ध्यान त्यही बैठकतर्फ तानिएको छ ।

तर, विश्वकर्मा भने रुपन्देहीमा छन् । टेलिफोन सम्पर्कमा उनले भने, “अहिले राष्ट्रिय राजनीतिबारे खासै बुझ्न पाएको छैन, आफ्नै निर्वाचन क्षेत्रमा छु । अहिले मेरा लागि निर्वाचन क्षेत्रका जनतालाई महामारीबाट जोगाउनुपर्ने दायित्व बढी छ ।”

रुपन्देहीमै भए पनि उनलाई राष्ट्रिय राजनीति बारे प्रश्न सोध्नेहरुको संख्या बाक्लो छ । यसको प्रमुख कारण प्रधानमन्त्री ओलीलाई साथ दिनेमध्येका उनी एक महत्वपूर्ण नेता हुन् ।

तर, रोचक चाहिँ के भने विश्वकर्मा मात्रै नेकपामा ओली खेमा भनिने गुटका यस्ता एकमात्र स्थायी कमिटी सदस्य हुन्, जो सरकारको कुनै पनि लाभको पदमा छैनन् । जबकि प्रधानमन्त्री निकट सबै उच्च तहका नेताहरू अहिले विभिन्न राजकीय भूमिकामा छन् ।

यसका लागि स्थायी समिति सदस्य र पदको फेहरिस्त नै हेरौं ।

२०७१ सालमा सम्पन्न एमालेको नवौं महाधिवेशन यता प्रधानमन्त्री ओलीको टीममा रहेका स्थायी कमिटी सदस्यहरु ईश्वर पोखरेल, प्रदीप ज्ञवाली, पृथ्वीसुब्बा गुरुङ, किरण गुरुङ, रघुवीर महासेठ, सत्यनारायण मण्डल, सुवास नेम्वाङ, शंकर पोखरेल र विष्णुप्रसाद रिमालले पटकपटक सत्तामा महत्वपूर्ण जिम्मेवारी पाएका छन् ।

गएको ५ मंसीरमा भौतिक पूर्वाधार तथा यातायात मन्त्रीबाट महासेठको बहिर्गमन भए पनि बाँकी स्थायी कमिटी नेताहरु संघ र प्रदेशको महत्वपूर्ण भूमिकामा छन् । ईश्वर पोखरेल उपप्रधान तथा रक्षामन्त्री छन् भने प्रदीप ज्ञवाली परराष्ट्र मन्त्री । पृथ्वीसुब्बा गुरुङ र शंकर पोखरेल मुख्यमन्त्री छन् भने विष्णु रिमाल प्रधानमन्त्रीकै प्रमुख राजनीतिक सल्लाहकार । सत्यनारायण मण्डल प्रदेश–२ मा संसदीय दलका नेता हुन् ।

२०६३ यता लगातार सभामुख रहेका नेम्वाङ प्रतिनिधिसभाको संसदीय दलका उपनेता हुन् । ओलीलाई साथ दिएकी विद्यादेवी भण्डारी दोस्रो कार्यकालका लागि राष्ट्रपति छन् ।

अध्यक्ष ओलीको सदिच्छाकै कारण वामदेव गौतम पार्टी उपाध्यक्ष छन् । ओली खेमाकै मानिने विष्णु पौडेल पार्टी महासचिवको कार्यकारी भूमिकामा छन् ।

पछिल्लो अध्यादेश प्रकरणपछि भने गौतम र पौडेल ओली नभई अर्का कार्यकारी अध्यक्ष पुष्पकमल दाहाल र वरिष्ठ नेता माधवकुमार नेपालतर्फ नजिक देखिएका छन् ।

तर, यी नेताहरुसँग एउटै (स्थायी कमिटी) कमिटीमा रहेर पनि सत्ताको सुविधा र शक्तिबाट छविलाल विश्वकर्मा निकै टाढा देखिन्छन् । “मुलुक महामारी विरुद्ध लडिरहेका बेला सत्ताको भन्दा जनप्रतिनिधिको भूमिका मलाई महत्वपूर्ण बनेको छ”, उनी भन्छन् ।

विश्वकर्मा रुपन्देही–१ बाट निर्वाचित सांसद हुन् ।

अध्यादेश प्रकरणमा सरकार र पार्टीलाई धक्का लागेका कारण स्थायी कमिटी बैठकको माग गर्दै अहिले स्थायी कमिटी सदस्य विश्वकर्मा जस्तै राजकीय भूमिकामा नरहेका २० जनाले हस्ताक्षर संकलन गरी पार्टीलाई बुझाएका छन् । हस्ताक्षर संकलन गर्ने सबै अध्यक्ष ओली इतर गुटका हुन् । दाहाल–नेपाल निकटका केही स्थायी कमिटी सदस्य भने ओली मन्त्रिपरिषद्का सदस्य भएकाले यसमा हस्ताक्षर गरेका छैनन् ।

लामो समय वरिष्ठ नेता नेपालसँग नजिक विश्वकर्मा दोस्रो जनआन्दोलनपछिको गिरिजाप्रसाद कोइराला नेतृत्वको अन्तरिम सरकारमा कृषि मन्त्री समेत बने । तर, एमालेको आठौं महाधिवेशनपछि भने उनले ओलीलाई साथ दिदै आएका छन् ।

तर, पनि सत्ताको भूमिका नपाउने ओली टीमका उनी एक्लो स्थायी कमिटी सदस्य हुन् । जबकि दलित समुदायबाटै नेकपाको उच्च तहमा रहेका एउटै नेता हुन्, विश्वकर्मा ।