डोनाल्ड ट्रम्पलाई डब्लुएचओ प्रमुखको जवाफ, “भाइरसमाथि राजनीति नगर”
विश्व स्वास्थ्य संगठन (डब्लुएचओ) महानिर्देशक टेड्रोस अधनोम घेब्रेएससले अमेरिकी राष्ट्रपति डोनाल्ड ट्रम्पलाई कोभिड-१९ भाइरसमाथि राजनीति नगर्न आग्रह गरेका छन्। उनले यो वेला एकता कायम गर्न पनि आग्रह गरेका छन्।
डब्लुएचओ प्रमुख घेब्रेएससले आफूहरुले हरेक देशलाई हेरिरहेको र नजिक रहेर काम गरेको बताएका छन्। आफूहरु राजनीति र रंगभेदबाट टाढा रहेको पनि उनको दाबी छ।
बुधबारको प्रेस ब्रिफिङमा घेब्रेएससले भने, “यदि धेरैभन्दा धेरै लास ब्यागमा राख्न नचाहने हो भने कोभिड-१९ माथिको राजनीति तुरुन्त रोकिनुपर्छ, भाइरसमाथिको राजनीति क्वारेन्टिनमा पठाउनुपर्छ।” चीन र अमेरिकाका नेतृत्वले यो महामारीमा एकता प्रदर्शन गर्नुपर्ने पनि उनले बताए।
हरेक जनता कुनै न कुनै दलसँग आस्थावान हुने भन्दै आफ्ना नागरिकको ज्यान बचाउन राष्ट्रिय एकता कायम गर्नुपर्ने उनले बताए। डब्लुएचओ प्रमुखले भने, “म पनि राजनीतिमा थिएँ, मलाई थाहा छ राजनीति गर्नेलाई कति गारो हुन्छ। तर, आफ्ना जनतालाई बचाउने हो भने रोगमाथि राजनीति नगर।”
राष्ट्रपति ट्रम्पले यसअघि डब्लुएचओलाई दिने बजेट कटौतीका लागि छलफल गर्ने घोषणा गरेका थिए। ट्रम्पले गत मंगलबार कोभिड-१९ सम्बन्धि दैनिक प्रेस ब्रिफिङमा बोल्दै डब्लुएचओले चीन केन्द्रित अभियान चलाएको आरोप लगाएका थिए।
डब्लुएचओले कोभिड-१९ संक्रमितहरुबारे वास्तविक तथ्याङ्क बाहिर ल्याउन नसकेको पनि जनाएका थिए। चीनले तथ्याङ्क लुकाइरहेको उनको आरोप थियो। गत मंगलबार ट्विटसमेत गरेर ट्रम्पले डब्लुएचओ चीन केन्द्रित भएको भन्दै उनीहरुले चीनसँगको सम्बन्ध खुला गर्न दिएको सुझाव अस्वीकार गर्ने बताएका थिए।
यसअघि राष्ट्रपति ट्रम्पले कोभिड १९ लाई ‘चाइनिज भाइरस’ बताउने गरेका थिए। त्यति वेलाम पनि डब्लुएचओ महानिर्देशक घेब्रेएससले भाइरसबारे रंगभेदी विचार नराख्न आग्रह गरेका थिए। पछि ट्रम्प र चिनिया राष्ट्रपति सी चीन फिङबीच फोनवार्ता भएपछि उनले यस्तो भन्न छाडेका छन्।
डब्लुएचओको कूल बजेटको १५ प्रतिशत अमेरिकाले दिन्छ। कुनै पनि देशले डब्लुएचओलाई दिने यो सबैभन्दा धेरै रकम हो। महानिर्देशक घेब्रेएससले अमेरिकाले यो बजेट नकाट्ने विश्वास पनि व्यक्त गरेका छन्।
-1732452683.jpg)
-1732353496.jpg)