जंगली हात्तीको बथानद्वारा गहुँ बालीमा क्षति
कञ्चनपुरको शुक्लाफाँटा नगरपालिकाको चुरे क्षेत्र नजिकका बासिन्दाले लगाएको अन्न बालीमा जंगली हात्तीको बथानले व्यापक क्षति पुर्याउन थालेको छ । तीन दिनदेखि करीब २० संख्यामा रहेको हात्तीको बथानले गहुँ, केराउ, मसुरो लगायत बालीमा नोक्सान पुर्याएको हो ।
हात्तीको बथान रातिको बेला स्थानीय किसानको खेतमा छिरेर बालीमा क्षति पुर्याउँदै आएको छ । नगरपालिकाको वडा नं ८ मा मात्रै हात्तीको बथानले सात जना किसानले खेतमा लगाएको गहुँ लगायत बालीमा क्षति गरेको वडाध्यक्ष बहादुरसिंह महराले बताए । सामुदायिक वन क्षेत्रमा लगाइएको १५ मिटर ग्याबिन तारजालीसमेत हात्तीको बथानले चुँडालेको छ ।
हात्तीको बथान साँझ नपर्दै नजिकैका सामुदायिक वनबाट खेतमा छिरेर क्षति पुर्याउन थालेपछि स्थानीयवासी हात्ती भगाउनकै लागि रातभर जाग्राम बस्दै आएका छन् । खेतमै आगो बालेर हात्ती भगाउनका तीन दिनदेखि खेतमै बस्दै आएको स्थानीयवासी बिन्ता जागरीले बताए ।
वर्षातको बेलासमेत यस क्षेत्रमा हात्तीको बथानले धान बालीमा व्यापक नोक्सानी गरेको थियो । हात्ती लगायत जंगली जनावरले खेतमा लगाएको बालीमा नोक्सानी पु¥याउँदै आएपछि स्थानीय किसान साँझ–बिहानको छाक टार्नकै लागि भारतमा मजदूरी गर्न जान बाध्य भएका छन् ।
हात्तीको बथानले नगरपालिकाको वडा–७ को सिमलफाँटा लगायतमा किसानले लगाएको गहुँ बालीसमेतमा क्षति गरेको छ । हात्तीको बथानले प्रतिवर्ष नगरपालिकाका वडा नं १, २, ३, ४, ५, ७, ८ र १२ का किसानले लगाएको धान, गहुँ, उखु र केरालगायतको बालीमा क्षति पुर्याउने गरेको छ ।
-1732261651.jpg)
-1732259528.jpg)
