अर्थ/बजारबुधवार, कार्तिक २१, २०७५

पेट्रोलियम पाइपलाइनको काम आधा सकियो

हिमालखबर

हेटौंडा- पेट्रोलियम पदार्थको पाइपलाइन बिछ्याउने काम ५० प्रतिशत सकिएको छ।

तस्वीर स्रोत- दी हिमालयन टाइम्स

नेपाल आयल निगमको पेट्रोलियम पाइपलाइन परियोजनाका अनुसार सीमावर्ती भारतीय शहर रक्सौलदेखि अमलेखगञ्जसम्म ३७ दशमलव ३५ किलोमिटरमा पाइपलाइन बिछ्याउने कार्यक्रमअन्तर्गत १९ किमिको काम सम्पन्न भएको हो।

रक्सौलदेखि अमलेखगञ्जसम्म विभिन्न अवरोध हटाउने काम अन्तिम चरणमा पुगेको र पाइपलाइन विस्तार द्रुतगतिमा भइरहेको परियोजना प्रमुख भानुभक्त खनालले जानकारी दिए।

पर्सा वन्यजन्तु आरक्ष क्षेत्रमा पर्ने रुख कटानका लागि वन मन्त्रालयबाट स्वीकृति पाइसकेकाले कटानीको काम पनि अगाडि बढेको छ।

रुख कटानको जिम्मा टिम्बर कर्पोरेसनलाई दिइएको छ। काटिएका रुखको क्षतिपूर्ति आयल निगमले वन मन्त्रालयलाई दिने सहमति भएको छ। आरक्ष क्षेत्रबाट करीब पाँच हजार ८८८ रुख काट्ने सहमति छ।

रुख कटान हुनासाथ एक महीनामा पाइपलाइन बिछ्याउने काम सम्पन्न हुने प्रमुख खनालको भनाइ छ। आरक्ष क्षेत्रको १० किमि क्षेत्र
पाइपलाइनको मार्गमा पर्छ।

भारतको दुई अर्ब ७५ करोड भारतीय रुपैयाँ लागतमा पाइपलाइन निर्माण भइरहेको छ। भारततर्फ विहारको मोतिहारीदेखि रक्सौलसम्मको ३ किमि पाइपलाइन बिछ्याउन बाँकी छ। रासस

प्रतिकृया दिनुहोस