खेलकुदमंगलवार, भाद्र २६, २०७५

साफः भाेलि बुधबार इतिहास रच्ने दाउमा नेपाल

हिमालखबर

नेपालले बुधबार दिउँसो ३:४५ बजे साफ च्याम्पियनसीपको पहिलो सेमिफाइलन माल्दिभ्सविरुद्ध खेल्दैछ। पच्चीस वर्षे साफ च्याम्पियनसीपको इतिहासमा बुधबार ढाकास्थित बङ्गबन्धु रङ्गशालामा हुने सेमिफाइनल नेपालका लागि इतिहास रच्ने अवसर हो।

अहिलेसम्म सेमिफाइनलभन्दा माथि नपुगेको नेपाल माल्दिभ्सलाई पराजित गर्नसके साफ च्याम्पियनसीपमा नयाँ इतिहास कायम गर्न सफल हुनेछ। पाँचौपटक सेमिफाइनल खेल्न लागेको नेपाली टोलीका लागि माल्दिभ्स केही कमजोर प्रतिद्वन्द्वी देखिएको छ।

समूह चरणमा दुई खेल खेलेको माल्दिभ्स एकमा पराजित र एकमा बराबरी गर्दै गोलाप्रथाद्वारा सेमिफाइनल पुगेको हो। पहिलो सेमिफाइनलमा प्रतिस्पर्धाका लागि मैदान उत्रदै गर्दा दुवै टोलीको लक्ष्य फाइनल पुग्नु रहनेछ। नेपाल भने एक खेलमा पराजित र दुई खेलमा विजयी हुँदै सेमिफाइल पुगेको हो। यसअघि पनि सन् १९९३, सन् १९९९, सन् १९९५, सन् २०११ मा नेपाल सेमिफाइनलसम्म पुगेको थियो।

नेपालले साफ च्याम्पियनसीपमा माल्दिभ्सलाई अहिलेसम्म पराजित भने गर्न सकेको छैन। साफ च्याम्पियनसीपमा नेपाल र माल्दिभ्स अहिलेसम्म छ पटक खेलेका छन्। जसमा चार खेल माल्दिभ्सले जितेको थियो भने दुई खेलमा बराबरी नतिजा निस्केको थियो। नेपालले साफमा माल्दिभ्सविरुद्ध सात गोल गर्दा १४ गोल खाएको छ।  साफ च्याम्पियसीपको सन् २००९ र २०११ को संस्करणमा बराबरी गर्न सफल नेपाल त्यसअघि भएका संस्करणमा भने पराजित भएको थियो।

नेपाल बुधबार हुने सेमिफाइनल जित्दै माल्दिभ्सविरुद्धको जितविहीन यात्राको अन्त्य गर्ने लक्ष्यमा हुनेछ। “धेरै वर्षपछि हामी सेमिफाइनलमा पुगेका छौँ, अब माल्दिभ्ससँग खेल्नुपर्नेछ, माल्दिभ्स राम्रो टोली हो,  उनीहरूलाई कमजोर मान्नु हुन्न” ढाकामा सञ्चारकर्मीलाई सङ्क्षिप्त प्रतिक्रिया दिँदै नेपाली राष्ट्रिय टोलीका कार्यवाहक मुख्य प्रशिक्षक बालगोपाल महर्जनले भने।

नेपालले ढाकामा मात्र माल्दिभ्सविरुद्ध चार खेल खेलेको छ। जसमा नेपालले एक जित, दुईमा बराबरी र एकमा हार बेहोरेको छ। माल्दिभ्सविरुद्ध नेपालका पूर्व स्ट्राइकर हरि खड्काले सर्वाधिक चार गोल गरेका छन्। यस्तै नवयुग श्रेष्ठको नाममा तीन गोल छ।

नेपालले माल्दिभ्ससँग खेलेको पछिल्लो खेल सन् २०१६ को बङ्गबन्धु गोल्डकप हो। उक्त खेलमा नेपालले माल्दिभ्सलाई ४–१ ले हराएको थियो।  

माल्दिभ्सलाई जितेमा इतिहास रच्दै नेपालले फाइनल भारत र पाकिस्तानबीचको विजेतासँग खेल्नेछ।

दोस्रो सेमिफाइलनमा भारत–पाकिस्तान
बुधबारै साँझ हुने दोस्रो सेमिफाइनलमा भारत र पाकिस्तान प्रतिष्पर्धा हुनेछ। सेमिफाइनलमा पुगेका चारमध्ये भारतले सर्वाधिक सातपटक तथा माल्दिभ्सले एक पटक साफ च्याम्पियनसीपको उपाधि जितिसकेका छन्।

नेपाल र पाकिस्तान भने अहिलेसम्म सेमिफाइनलभन्दा माथि पुग्न सकेका छैनन्। पाकिस्तान १३ वर्षपछि र नेपाल पाँच वर्षपछि अन्तिम चारमा पुगेका हुन्। – रासस

 

प्रतिकृया दिनुहोस