कीम जोङ नाम हत्याको सुनुवाई गर्ने मलेसियाली अदालतकाे आदेश
मलेसियाको एक अदालतले उत्तर कोरियाली नेता कीम जोङ उनका भाइ कीम जोङ नामको हत्या आरोपमा मलेसियामा पक्राउ परेका दुई महिलाका सम्बन्धमा सुनुवाई गर्न आदेश दिएको छ।
“आरोपित महिलाहरुले आफूमाथि लागेका आरोपको सफाईका लागि प्रक्रिया अगाडि बढाउन सक्छन्,” शाह आलम उच्च अदालतका न्यायाधीश आज्मी आरीफिनको आदेशमा भनिएको छ।
हत्या आरोपीहरुमा इन्डोनेसियाकी सिती आइस्याथ र भियतनामकी डोएन थी हुओङ रहेका छन्। ती महिलाले कीम जोङ नामलाई क्वालालम्पुर विमानस्थलमा स्नायूशक्ति ध्वस्त पार्ने भीएक्स एजेन्टले आक्रमण गरेका थिए।
यो आदेशको अर्थ नै अभियोजन हो। महिनौंदेखि यो मुद्दा अदालतमा विचाराधीन छ। उक्त अभियोजन अनुसार थुनामा रहेका महिलाहरु विरुद्ध हत्या आरोपको पुष्टी गर्ने पर्याप्त प्रमाणहरु छन्।
अदालतको आदेशपछि दुवै महिला आश्चर्यचकित हुँदै रुवाबासी गरेका थिए। पर्याप्त प्रमाण नभएको भए न्यायाधीशले दुवै महिलालाई छोड्ने आदेश दिने थिए।
आइस्याथका वकील गूई सूनले संवाददाताहरुलाई भने, “हामी अदालतको आदेशबाट असाध्यै निराश छौं, सुनुवाईका क्रममा हामी सकेसम्म प्रतिरक्षा गर्ने प्रयत्न गर्नेछौं।”
दोषी ठहर भएमा दुवै महिलाले मृत्युदण्डको सजाय पाउने छन्। कोरियाली जासूसको फन्दामा परेर आफूहरुले कीममाथि आक्रमण गरेको दुवै महिलाको दाबी छ। कीममाथि प्रहार गरिएको वस्तु खतरनाक हतियारमा सूचीकृत छ।
महिनौंसम्मको सुनुवाईका क्रममा अदालत समक्ष ती महिलाले आफूहरुलाई चारजना उत्तर कोरियालीले तालिम दिएको र हत्यामा उनीहरुकै प्रत्यक्ष संलग्नता रहेको बताउँदै आएका थिए।
महिलाहरुतर्फका वकीलले सरकारी अधिकारीहरुले आरोपित महिलाहरुले कीमको हत्या गर्नुपर्ने आधार प्रमाण जुटाउन नसकेको दाबी गरिरहेका छन्। उत्तर कोरियाली सत्तारुढ परिवारको समर्थन जुटाउन नसकेपछि कीम एक दशकदेखि निर्वासनमा रहँदै आएका थिए। – एएफपी