समाचारशनिवार, माघ २७, २०७४

त्रिशुली नदीमा जीप सहित खसेका सचिव यादव मृत अवस्थामा फेला, यादवले नै जीप चलाएको प्रहरीको भनाई

हिमालखबर

उद्धारमा संलग्न सुरक्षाकर्मी । तस्वीर: सानुबाबु तिमिल्सना

त्रिशुली नदीमा जीप खसेर बेपत्ता भएका सिंचाई मन्त्रालयका सचिव रामानन्द यादव मृत अवस्थामा फेला परेको छन् ।

सचिव यादव जीपभित्र चालकको सिटमा, सिट बेल्ट बाँधेको अवस्थामा फेला परेको सशस्त्र प्रहरीका गोताखोहरुले जनाएका छन् ।

इलाका प्रहरी कार्यालय गजुरीका प्रहरी निरीक्षक सञ्जय तिमिल्सिनाका अनुसार जीप सचिव यादवले नै चलाएका थिए ।

पृथ्वी राजमार्ग अन्र्तगत धादिङको बेनिघाट रोराङ गाउँपालिका वडा नं ३ सलाङघाटस्थित त्रिशुली नदीमा आज, शनिबार बिहान जीप खस्दा सचिव यादवका २५ वर्षका छोरा सन्तोष यादव र जीपमा सवार १५ वर्षका उन्नती गुप्ता बेपत्ता छन् । उनीहरुको खोजी कार्य जारी छ ।

कपिलबस्तुबाट काठमाडौं जाँदै गर्दा यादव सवार बा २ झ ३१४० नम्बरको जीप शनिवार विहान २ः४५ बजेतिर त्रिशुली नदीमा खसेको थियो ।

जीप खस्दा घाईते भएका गाडीका चालक नीरन्जन यादव अधिकारीको मलेखु स्थित राजमार्ग सामुदायिक अस्पतालमा प्राथमिक उपचार गरी थप उपचारको लागि काठमाडौँस्थित ट्रमा सेन्टरमा लगिएको जिल्ला प्रहरी कार्यालय धादिङले जानकारी दिएको छ ।

सो क्रममा उद्धारमा खटिएका गोताखोर, सशस्त्र प्रहरी हवल्दार तारानाथ चापाई समेत घाइते भएका छन् ।

पानीभित्र अन्य व्यक्तिहरुको अवस्थाबारे बुझ्न गएका उनी गाडिभित्रै अड्किएपछि अन्य सहयोगीले बाहिर निकालेका थिए ।

बेहोस अवस्थामा रहेका उनलाई उपचारको लागि अहिले राजमार्ग सामुदायिक अस्पताल मलेखु लगिएको प्रहरीले जनाएको छ ।
सानुबाबु तिमिल्सना, धादिङ

प्रतिकृया दिनुहोस