समाचारमंगलवार, पौष २५, २०७४

डा केसी प्रहरी हिरासतमै, भोलि मात्रै बहस हुने

हिमालखबर

अदालतको अवहेलना मुद्दामा पक्राउ परेका प्राध्यापक डा गोविन्द केसीको मुद्दा आज हेर्दाहेर्दैमा परेपछि भोलिमात्रै उक्त मुद्दामा बहस हुने भएको छ ।

न्यायाधीशद्वय ओमप्रकाश मिश्र र केदार चालिसेको इजलासमा आजै बहस शुरू गर्ने तयारी भए पनि समय अपुग हुँदा भोलि मात्रै बहस हुने भएको अधिवक्ता ओमप्रकाश अर्यालले जानकारी दिए ।

“डा केसीसँग बयान लिइसकेको भए पनि समायभावका कारण आज बहस शुरु हुन सकेन । उहाँ अझै प्रहरी नियन्त्रणमै हुनुहुन्छ, प्रहरी वृत्त, सिंहदरबार लगिएको छ,” अर्यालले भने ।

भोलि उक्त मुद्दामा पक्ष र विपक्षका वकिलहरुहरुले बहस गर्नेछन् ।

डा केसीले आज सर्वोच्च अदालतमा दिएको बयानमा न्यायालयको अपमान र मानहानी गर्नै आफ्नो कुनै उद्देश्य नभएको, तर गलत क्रियाकलापको विरुद्ध भने आफू लडिरहने बताएका थिए ।

प्रा डा केसीले त्रिवि चिकित्सा शास्त्र अध्ययन संस्थानका डीनमा प्रा डा शशि शर्मालाई पुनःबहाली गराउने अदालतको आइतबारको फैसलाको विरोधमा प्रधानन्यायाधीश गोपाल पराजुलीको राजीनामा माग गरी अनशन शुरु गरेका थिए । उनलाई सोमबार साँझ अनशनस्थल त्रिवि शिक्षण अस्पतालबाट प्रहरीले पक्राउ गरी हिरासतमा राखेको थियो ।

प्रतिकृया दिनुहोस