समाचारबुधबार, ५ पौष , २०७४

वीरगञ्ज आगलागी अपडेटः एक किलोमिटर वरपरका वस्ती खाली गराइयो, आगो आफैं ननिभ्दासम्म पर्खिनु पर्ने

हिमालखबर

तस्वीर: जियालाल साह

वीरगञ्ज– २२ स्थित सुपर ग्यास उद्योगमा भएको आगालागी नियन्त्रणका लागि सतर्क रहेर पर्खने बाहेक अन्य उपाय नभएको भारतीय अग्नी नियन्त्रण विशेषज्ञले बताएका छन् ।

पर्साका प्रमुख जिल्ला अधिकारी विनोदप्रकाश सिंहका अनुसार भारतबाट आएका अग्नी नियन्त्रण विशेषज्ञ र नेपालकै उपलब्ध विशेषज्ञको सल्लाह अनुसार आगो आफैं नियन्त्रण नभइन्जेल सतर्क अवस्थामा रहनु बाहेक अन्य उपाय नभएकाले अहिले उद्योग वरपर एक किलोमिटरसम्मका वस्तीहरु खाली गराएको छ ।

विहान करिब ६ बजेदेखि शुरु भएको आगालागी अझै नियन्त्रणमा आउन सकेको छैन । आगोको चपेटामा परी आगो निभाउन पुगेको महानगरपालिकाको एउटा दमकल ध्वस्त भएको छ भने दुई जना अग्नी नियन्त्रकको मृत्यु भएको छ ।
-------------------------------------------------------------------------------------------

वीरगञ्ज : ग्यास उद्योगमा आगलागी, दुई अग्निनियन्त्रकको मृत्यु

वीरगञ्ज महानगरपालिका– २२ स्थित सुपर ग्यास उद्योगमा आगो लागेको छ । आगो निभाउन दमकल सहित पुगेका नगरपालिकाका दुईजना अग्निनियन्त्रक कर्मचारीको पनि आगोको चपेटामा परी मृत्यु भएको छ । 

विहान करिब ६ बजेदेखि शुरु भएको आगालागी विहान साढे १० बजेसम्म पनि नियन्त्रणमा आउन सकेको छैन ।

ठूलो आवाजसहित ग्यास सिलिण्डर विष्फोट भइरहेका छन् । भवानीपुर र सुकचैनाको बीचमा गण्डक नहरसँगै रहेको सुपर ग्यास उद्योगमा ग्यास लिकेज भई आगो लागेको हो ।

गए राति ग्यास बुलेटबाट भण्डारमा ग्यास भर्ने क्रममा लिकेज भइरहेको खबर पाएपछि नियन्त्रणका लागि पुगेको महानगरपालिकाको दमकल घटनास्थल नजिकै पुग्दा आगो लागि दुई जनाको मृत्यु भएको प्रहरीले जनाएको छ ।

मृत्यु हुनेमा वीरगञ्ज महानगरपालिकाका अग्निनियन्त्रक यादवप्रसाद अधिकारी र मधुसुदन मिश्रा छन् ।

दमकलसँगै घटनास्थल गएका प्रहरी हवलदार ब्रह्मनारायण जैसवालले भने, “ग्यास लिकेजको खबर पाएपछि दमकल सहित उद्योग नजिक पुग्यौं । लिकेज भएको ठाउँ चिस्याउने प्रक्रिया थाल्नु अघि दमकल रोकेर केही बेर छलफल गरी उद्योगको गेट भएरै दमकल अगाडि बढाउने निधो भयो । तर, गाडी स्टार्ट गर्ने वित्तिकै साइलेन्सरको झिल्कोले सबैतिर टिप्यो ।”


दमकल भित्र रहेका अर्का नियन्त्रक सञ्जीव नेपाल, राममान तत्वा र दमकल चालक अरुणकुमार महतो गम्भीर घाईते भएका छन् । नेपाल र महतोलाई उपचारका लागि नेपाली सेनाको हेलिकप्टरमार्फत काठमाडौं लगिएको छ ।

आगलागीले सुपरग्यास उद्योगमा काम गर्ने अपरेटर अम्बिका पटेल पनि घाईते भएको उद्योग सञ्चालक अबुलेश अंसारीले जानकारी गराएका छन् ।

आगलागीले महानगरपालिकाको २० वर्ष पुरानो तीन नम्बर भनिने दमकल गाडी, ग्यास बुलेट रहेको गाडी र उद्योगको अधिकांश भाग पूर्ण ध्वस्त भएको जिल्ला प्रहरी कार्यालय पर्साले जनाएको छ ।

आगो नियन्त्रणका लागि नेपाल प्रहरी, सशस्त्र प्रहरी, नेपाली सेना, वीरगञ्ज महानगरपालिकाको अर्को दमकल, कलैया उपमहानगरपालिका, सिमरा एयरपोर्ट, हेटौडा नगरपालिका र भारत रक्सौलको दमकल बाट प्रयास भइरहे पनि अहिलेसम्म सफल हुन सकेको छैन ।

उद्योगभित्रबाट लगातार विष्फोटको आवाज आइरहेको छ । उद्योगभित्र रहेका सिलिण्डरहरु पड्किरहेका छन् भने त्यहाँ भण्डारण गरी राखिएको सबैभन्दा ठूलो ग्यास बुलेट पड्किने सम्भावनाका कारण नजिक जान सकिने स्थिति पनि छैन ।

प्रहरीले उद्योगको १ किलोमिटर परसम्मका सबै घर वस्ती खाली गराएको छ । 
जियालाल साह, वीरगञ्ज

प्रतिकृया दिनुहोस