समाचारशुक्रवार, आश्विन २७, २०७४

बाबुरामको दल एक्लै चुनाव लड्ने

हिमालखबर

१० दिनअघि विशेष कार्यक्रमको आयोजना गरी एमाले लगायतका वाम दलहरुको गठबन्धनमा सहभागी भएको घोषणा गरेको नयाँ शक्ति पार्टी अहिले उक्त गठबन्धनबाट अलग भएको छ ।

एमालेकै निर्वाचन चिह्न सूर्य लिएर नै निर्वाचनमा जान भएको सहमति विपरितका गतिविधि भएको भन्दै बाबुराम भट्टराई नेतृत्वको नयाँ शक्ति पार्टी गठबन्धनबाट बाहिरिएको हो ।

नयाँ शक्ति पार्टीको शुक्रबार बसेको सचिवालय बैठकले मंसीर १० र २१ मा हुने प्रतिनिधिसभा र प्रदेशसभाको निर्वाचनमा आफ्नै चुनाव चिह्न आँखा लिएर सहभागी हुने निर्णय गरेको हो ।

माओवादी केन्द्रले गोरखाका दुवै क्षेत्र नछाड्ने अडान लिएपछि भट्टराई एक्लै चुनाव लड्ने निर्णयमा पुगेका हुन् । बैठकले संयोजक बाबुराम भट्टराईले गोरखा– २ बाट उम्मेदवारी दिने पनि निर्णय गरेको छ ।

बैठकले गणतन्त्र, संघीयता, धर्मनिरपेक्षता र समावेशीतालाई अस्वीकार गर्ने राजनीतिक पार्टीहरु, व्यक्ति–व्यक्तित्वबाहेक सबैसँग संघ र प्रदेशस्तरमा चुनावी तालमेल गर्ने निर्णय गरेको छ ।

तालमेल भएको क्षेत्रमा बाहेक संघ र प्रदेशका सबै निर्वाचन क्षेत्रहरुमा उम्मेद्वारी दिने पनि नयाँ शक्तिले निर्णय गरेको छ ।

प्रतिकृया दिनुहोस