आज राष्ट्रिय प्रजातन्त्र दिवस
नेपाली जनताको बलिदानीपूर्ण सङ्घर्षबाट निरङ्कुश राणा शासनको अन्त्य र लोकतन्त्रको थालनी भएको दिनका सम्झनामा मनाउँदै आइएको राष्ट्रिय प्रजातन्त्र दिवसको अवसरमा आज काठमाडौंमा विशेष कार्यक्रम आयोजना गरिएको छ ।
सैनिक मञ्चमा आयोजित ६७ औँ राष्ट्रिय प्रजातन्त्र दिवस २०७३, को विशेष समारोहमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री पुष्पकमल दाहाल ‘प्रचण्ड’ प्रधानन्यायाधीश सुशीला कार्कीलगायत मन्त्रीगण, संवैधानिक नियोगका प्रमुख एवम् कूटनीतिक नियोगका प्रमुखको उपस्थिति थियो ।
सो अवसरमा राष्ट्रिय प्रजातन्त्र दिवस २०७३, मूल समारोह समितिका अध्यक्ष समेत रहेका प्रधानमन्त्री पुष्पकमल दाहालले संविधान कार्यान्वयनका लागि निर्वाचन अनिवार्य भएको बताउँदै त्यसका लागि सरकार सचेत रहेको बताए ।
उनले भने, “संविधानसभाले जारी गरेको संविधानको कार्यान्वयनका लागि चुनाव अनिवार्य छ, शान्ति प्रक्रिया तार्किक निष्कर्षमा पुगी राजनीतिक सङ्क्रमणको एउटा महत्वपूर्ण अध्याय समाप्त हुन्छ भन्ने कुरामा सरकार गम्भीर र सचेत छ ।”
संविधान कार्यान्वयनमा सङ्घीयता नै सबैभन्दा चुनौतीपूर्ण रहेको उल्लेख गर्दै उनले भने, “सङ्घीयतामार्फत सिंहदरबारको अधिकार, स्रोत र साधन संविधानको भावनाअनुरुप प्रदेश र स्थानीय तहमार्फत जनताको घरदैलोसम्म पुर्याउनु मुख्य उद्देश्य हो, यसबाट पहिचानको चाहना पूरा हुने मात्र होइन, शासन व्यवस्था जवाफदेही हुने र अवसरबाट वञ्चित र पछाडि परेका वर्ग र समुदायको पहुँच बढ्न गई समग्र राज्य प्रणालीप्रति जनताको वैधता र स्वीकार्यता बढ्छ ।”
उनले राष्ट्रिय एकतालाई मजबुत बनाउन र नेपाललाई समृद्धिको दिशातर्फ उन्मुख गराउन आ–आफ्नो ठाउँबाट योगदान गर्न सबै राजनीतिक दल, राष्ट्रसेवक कर्मचारी, सबै सुरक्षा निकाय तथा आमजनता समक्ष आह्वान गरे।
समारोहमा नेपाली सेनाको हेलिकोप्टरबाट ६७ औँ राष्ट्रिय प्रजातन्त्र दिवस २०७३ अङ्कित ब्यानर प्रदर्शन, पुष्पवृष्टि र बेलुन उडाइएको थियो ।
समारोहमा राष्ट्रपति भण्डारी, उपराष्ट्रपति पुन, प्रधानमन्त्री प्रचण्ड र प्रधानन्यायाधीश कार्कीले शान्तिका प्रतीक परेवा उडाएका थिए ।
त्यसैगरी ज्ञात र अज्ञात शहीदप्रति उच्च सम्मान र श्रद्धाञ्जलि अर्पण, नेपाली सेना, नेपाल प्रहरी, सशस्त्र प्रहरी बल, नेपाल स्काउट र विभिन्न विद्यालयका विद्यार्थीले मार्च पास गरेका थिए ।
राष्ट्रिय खेलकुल परिषद्बाट विविध खेल प्रदर्शन गरिनुका साथै काठमाडौँ महानगरपालिका, ललितपुर उपमहानगरपालिका, भक्तपुर नगरपालिकालगायतले झाँकी प्रदर्शन गरेका थिए । राष्ट्रिय प्रजातन्त्र दिवसको कार्यक्रम हेर्नका लागि टुँडिखेल वरपर सर्वसाधारणको भीड लागेको थियो ।
रासस