समाचारबिहिबार, ३० जेठ , २०७६

महिनावारी हुँदा शिक्षिका नै विद्यालय जाँदैनन्

रासस

बाजुरामा शिक्षिका नै महिनावारीको समयमा देउता लाग्ने डरले विद्यालय नजाने गरेको खुलेको छ ।

सदरमुकाम मार्तडी नजीक रहेको जनप्रकाश आधारभूत विद्यालयका शिक्षिकाहरु महिनावारी भएका बेला विद्यालय नजाने गरेको प्रधानाध्यापक प्रकाश ऐडीले बताए ।

विद्यालय नजीकै रतुडा देवताको मन्दिर रहेकाले महिनावारी भएको समयमा देउता लाग्ने डरले शिक्षिकाहरु विद्यालय नजाने गरेको उनकाे भनाइ छ । 

पुराना पुस्ताले महिनावारीको समयमा विद्यालय नजान प्रोत्साहित गरे पनि युवाहरुले त्यसको विरोध गर्दै आएका छन् ।

तर शिक्षिकाहरु नै अन्धविस्वास मानेर  विद्यालय जाँदैनन ।

स्थापनाकालदेखि नै यो प्रथा चलिआएकाले विद्यार्थीहरु यसबाट प्रत्यक्ष मारमा परेको प्रधानाध्यापक ऐडीले बताए । 

कहिलेकाहीँ आफू तालीम, गोष्ठीलगायतका काममा गएको समयमा दुवै जना शिक्षिका महिनावारी भएर विद्यालयको पढाइ नै ठप्प हुने गरेको उनको भनाइ छ ।

एक पुरुष र दुई महिला शिक्षक रहेको यो विद्यालयमा प्रारम्भिक बालविकास केन्द्रदेखि कक्षा ३ सम्म पढाइ भइरहेको छ ।

हाल १८ जनाको सङ्ख्यामा विद्यार्थीहरु अध्ययन गरिरहेका छ्न् ।

प्रतिकृया दिनुहोस