कला/साहित्यशुक्रबार, २२ चैत्र , २०७५

माटोको कथा अर्थात् ‘फातसुङ’ सार्वजनिक

हिमालखबर

नेपालीभाषी भारतीयले छुट्टै ‘गोर्खाल्यान्ड’का लागि गरेको आन्दोलनको पृष्ठभूमिमा रचिएको उपन्यास फातसुङ सार्वजनिक भएको छ ।

काठमाडौंमा शुक्रबार आयोजित कार्यक्रममा उपन्यासकार छुदेन काविमो, साहित्यकार खगेन्द्र संग्रौला, भूषिता वशिष्ठले पुस्तक लोकार्पण गरे ।

फातसुङ लेप्चा शब्द हो । यसको अर्थ ‘माटोको कथा’ हो ।

“फातसुङ गोर्खाल्यान्ड आन्दोलनका रक्तरञ्जित सपनाहरुको कारुणिक र त्रासद अभिलेख हो । आकारमा सानो, अर्थमा ठूलो आम मानिसको एक जीवन्तकथा । सरल वृत्तान्त र चित्रमयभाषाको सुन्दर समिश्रण ।

रुचिकर र आनन्दमयी”, कार्यक्रममा लेखक संग्रौलाले भने । उनले दार्जिलिङको कथा बोके पनि उपन्यासले नेपालको अवस्थालाई समेत बुझ्न सघाउने विश्वास व्यक्त गरे ।

कार्यक्रमकी वक्ता वशिष्ठले जनताको राजनीतिक चेतना अपूर्ण रहेकै कारण कतिपय अवस्थामा क्रान्ति तुहिएको र फातसुङ त्यसैको कथा भएको बताइन् । “पुस्तकले लोकभाषालाई जीवन्त राख्न सघाउने पुर्‍याउनेछ”, उनको भनाइ थियो ।

उपन्यासको पृष्ठभूमिबारे बताउँदै सन् २०१८ को युवा अकादमी पुरस्कार समेत प्राप्त लेखक लेखक काविमोलेफातसुङ दार्जिलिङको सपनाको कथा भएको बताए ।

“१९८६ मा पहिलो चोटि अलग राज्यको माग गर्दै दार्जिलिङमा गोर्खाल्यान्ड आन्दोलन भयो । सयौं मान्छे मारिए । त्योभन्दा ठूलो कुरा हजाराै‌को सपना भत्काइयो । र, १९८८ मा आन्दोलन दार्जिलिङ गोर्खा हिल काउन्सिलसँगको सम्झौतामा पुगेर टुङ्गियो”, काविमोले भने ।

उनले आफू त्यसपछि भयानक राजनीतिक संस्कारमा हुर्किएको पुस्ता भएको बताउँदै उपन्यास त्यही समाजको कथा भएको दाबी गरे ।

पुस्तकका प्रकाशन संस्था फाइनप्रिन्टका अजित बरालले काविमोको विशिष्ट र पृथक् लेखन शैलीले आफू कायल भएको कायल भएको बताए । “यो उपन्यासले नेपालीभाषी भारतीय लेखकहरुको पुस्तकप्रति हाम्रो रुचि जगाउने आशा छ”, उनले भने।

प्रतिकृया दिनुहोस