हेमन्तप्रकाश ओली ‘सुदर्शन’ पक्राउ
प्रतिबन्धित नेपाल कम्युनिष्ट पार्टीका स्थायी समिति सदस्य तथा मध्य केन्द्रीय कमाण्ड इन्चार्ज हेमन्तप्रकाश ओली ‘सुदर्शन’ पक्राउ परेका छन् ।
ओलीलाई नेपाल प्रहरीको विशेष ब्यूरो, महानगरीय प्रहरी अपराध महाशाखा र काभ्रे प्रहरीेले शुक्रबार राति काभ्रेबाट पक्राउ गरेको हो ।
महानगरीय प्रहरी अपराध महाशाखाका अनुसार, प्रहरीले ओलीसँगै पार्टीका रामकृष्ण खतिवडा,धर्मराज राजवाहक,शंकर अधिकारी, विजय श्रेष्ठ, सञ्जिव कार्की, लोकेन्द्र खड्का र वेद घिमिरे पनि पक्राउ परेका छन् ।
महानगरीय प्रहरी कार्यालयका अनुसार काभ्रेबाट बा १७ च ४८९३ नम्बरको स्कारपियो जिपमा काठमाडौंतर्फ आइरहेका ओलीसहितका ९ नेता कार्यकर्तालाई काभ्रेको खानीखोला–७, मिल्चेबाट पक्राउ गरिएको हाे ।
ओली नेकपाका महासचिव नेत्रबिक्रम चन्द ‘विप्लव’, र खड्ग विश्वकर्मा ‘प्रकाण्ड’पछि तेस्रो उच्चस्तरका नेता मानिन्छन् ।
प्रहरीले ओलीलाई पक्राउ गर्न यसैसाता प्रहरीले काभ्रेको रोशी गाउँपालिकास्थित काफलडाँडामा कारवाही गरेको थियो, जसमा उनी भाग्न सफल भएका थिए ।
विप्लव समूहले गत १० फागुनमा ललितपुरस्थित एनसेल मुख्यालयमा बम विष्फोट गराएको थियो, जसमा एक सर्वसाधारणको मृत्युसमेत भएको थियो ।
ओलीले उक्त विष्फोट पार्टीले गराएको भन्दैं जिम्मेवारी लिएका थिए ।