पश्चिम सेती यही सरकारले बनाउँछ: प्रम ओली
प्रधानमन्त्री केपी शर्मा ओलीले पश्चिम सेती जलविद्युत् आयोजना आफ्नै सरकारको पालामा निर्माण हुने बताएका छन्। डडेल्धुरा अमरगढी नगरपालिका–१, दूधकाँडेमा नेपाल विद्युत् प्राधिकरण स्याउले १३२/३३/१२१ केभी सबस्टेशन उद्घाटनमा बाेल्दै प्रम ओलीले साे कुरा बताएका हुन् । उनले सुदूरपश्चिम प्रदेशमा विद्युतीयकरण, सडक यातायात, शिक्षा बेरोजगारजस्ता समस्या समाधान गर्ने बताए।
डडेल्धुरासहित सुदूरपश्चिमका विभिन्न जिल्ला भारतसँग जोडिएका क्षेत्रमा पक्की पुल, झोलुङ्गे पुल र पक्की तथा झोलुङ्गे पुलको सम्भावना नभएका स्थानमा तुइन विस्थापित गर्दै केबुलकार सञ्चालन गरिने प्रम ओलीले आश्वासन दिए। उनले भने, “सरकारले बेरोजगारीका लागि केही भत्ता दिनेजस्ता काम गरिरहेको छ।”
सो अवसरमा सुदूरपश्चिम प्रदेशका मुख्यमन्त्री त्रिलोचन भट्ट, ऊर्जा जलस्रोत तथा सिँचाइमन्त्री वर्षमान पुन, भौतिक पूर्वाधार तथा निर्माणमन्त्री रघुवीर महासेठ, सुदूरपश्चिम प्रदेशका भौतिक पूर्वाधर विकासमन्त्री पठानसिंह बोहरा र नेपाल विद्युत् प्राधिकरण कार्यकारी निर्देशक कुलमान घिसिङ लगायतको उपस्थिति थियो । – रासस