थप समाचारमंगलबार, २९ माघ , २०७५

दिल्लीकाे होटलमा आगलागी हुँदा १७ जनाको मृत्य

हिमालखबर

दिल्लीको मध्य क्षेत्रमा रहेको एक होटलमा मङ्गलबार विहान आगलागी हुँदा कम्तिमा १७ जनाको मृत्यु भएको यहाँको अग्नि नियन्त्रण विभागले जनाएको छ। घटनामा अन्य ११ जना आगोले जलेर घाइते बनेका छन्।

तस्वीर: एनडीटीभी


करोल बाघस्थित गुरूद्वारा सडकमा रहेको अर्पित होटलमा मङ्गलबार बिहान करिब साढे चार बजेको समयमा आगलागी भएको सूचना विभागमा भएको र तत्काल बारूण यन्त्रसहित केही अग्नि नियन्त्रक त्यसतर्फ गएपनि उनीहरूलाई जोगाउन नसकिएको प्रहरी उप–आयुक्त एमएस रान्धावाले बताए।

विभागका प्रमुख अतुल गर्गले भने, “उद्धार टोलीलाई विहान ४:३५ मा सूचना प्राप्त भए लगत्तै उद्धारका लागि पठाइएको र उक्त टोलीले होटेलभित्र फसेका ३५ जनालाई सकुशल उद्धार गर्न सकिएको थियो भने १७ जनाको घटनास्थलमा नै जलेर मृत्यु भएको थियो।”

उद्धार टोलीले घटनास्थलबाट १३ जनाको मृत शरीर राम मनोहर लोहिला अस्पताल र अन्य चार जनाको मृत शरिर लेडी हार्डिनेज मेडिकल कलेज तथा बिएलके अस्पताल अन्तिम परीक्षण रिपोर्टका लागि पठाइएको छ।

एक महिला र एक बालकले आगलागीपछि आत्तिएर अस्पताल भवनको झ्यालबाट हाम फालेका कारण मृत्यु भएको छ भने अन्य १५ जनाको अस्पतालको कोठाभित्र नै जलेर ज्यान गएको बताइएको छ ।

आगोमा जलेर घाइते बनेका ११ जनाको स्थानीय अस्पतालमा उपचार भइरहेको छ।

प्रहरी उप–आयुक्तले भने, “आगलागी घाइते केहीको अवस्था गम्भीर रहेकोले मृतक सङ्ख्या केही बढ्नसक्ने देखिएको छ ।”

चारतले होटलमा ३५ कोठा रहेका थिए भने सोमबार उक्त होटल एउटा परिवारले कार्यक्रमका लागि लिएको आफूलाई जानकारी भएको उनले बताए।

आगलागी कसरी शुरू भयो भन्नोबारे स्पष्ट कारण नखुलिसकेको तर छानविन शुरू भैसकेको दिल्लीका प्रहरी उप–आयुक्त रान्धावाले भने । – एएनआई

प्रतिकृया दिनुहोस