११ गरीब परिवारलाई आरडीसीको बीस लाख सहयोग
ग्रामीण विकास केन्द्र (आरडीसी) ले ११ विपन्न परिवारलाई व्यवसायको लागि करीव बीस लाख बराबरको सहयोग गरेको छ ।
केन्द्रले काठमाडौं नैकापका गोपाल रोक्का, सतुंगलका भिमबहादुर महर्जन, विशाल मिया, ममता निरौला, गीता खडका, कोटेश्वरका दिलकुमार गुरुङ, मोहम्मद फिरोज, बुढानिलकण्ठका अनिता थापामगर र ललितपुर चापागाँउकी रेणु गिरी, पञ्चकुमारी राई, खोकनाका मोते मियालाई खुद्रा किराना पसल खोल्न जनही एकलाख ८० हजार बराबरको सहयोग हस्तान्तरण गरेको हो ।
उनीहरुलाई उक्त रकम बराबरको किराना सामग्री वितरण गरिएको आरडीसीका अध्यक्ष पारस हुसैनले बताएका छन् ।
रौतहटमा केन्द्रीय कार्यालय रहेको उक्त संस्थाले पश्चिम एशियाली दाता संस्था कतार च्यारिटीमार्फत् प्राप्त सहयोग वितरण गरेको जनाएको छ ।
सो अवसरमा पूर्वप्रधानमन्त्री माधवकुमार नेपाल र सांसद् अतहर कमाल मुसलमानले कतार च्यारिटीको सहयोगको प्रशंसा गरे ।
कार्यक्रममा कतार च्यारिटीका नेपाल प्रतिनिधि अब्दुल अजिज्, इस्लामिक रिलिफका नेपाल निर्देशक तलाह जमाल, मुस्लिम अधिकारकर्मी मो. मकसुद राँकी, विश्व शिक्षाका समिन अख्तर, समाज कल्याण परिषद्का उपाध्यक्ष नीलमणि बराल लगायतको उपस्थिति थियो ।
कतार च्यारिटी र इस्लामिक रिलिफले सन् २०१५ देखि नेपालमा सहायता परियोजनाहरु चलाइरहेका छन् ।